Timmissat illersorneqarnerat pillugu Namminersornerullutik Oqartussat nalunaarutaat nr. 38, 6. december 2001-imeersoq.

 

Kalaallit Nunaanni pinngortitamik allanngutsaaliuineq pillugu landstingip inatsisaani nr. 11-mi, 12. november 1980-imeersumi § 2, imm. 3, § 3, imm. 1 nr. 2 aamma § 19 kiisalu Piniarneq aallaaniarnerlu pillugit Inatsisartut inatsisaanni nr. 12-imi, 29. oktober 1999-imeersumi § 8, § 13, imm. 3, aamma §17, imm. 2 naapertorlugit aalajangersarneqarput:

 

Atuuffiit nassuiaatillu

§ 1. Nalunaarut nunami imaanilu aalisarnikkut Kalaallit Nunaata oqartussaaffigisaani atuuppoq.
Imm. 2. "Kalaallit Nunaata kitaata kujataa" nalunaarummi matumani paasineqassaaq nunatut Kangaatsiap Kommuniata kommunitut avannamut killeqarfiata kujataaniittutut aamma Nanortaliup Kommuniata kommunitut kangimut killeqarfiata kitaaniittutut.
Imm. 3. "Kalaallit Nunaata sinnera nalunaarummi matumani paasineqassaaq sumiiffittut imm. 2-mi sumiiffiit taaneqartut avataanniittutut, allanik taasaqartoqarsimanngippat.
Imm. 4. Imm. 2 aamma imm. 3 naapertorlugit sumiiffiit agguataarneri, nunap assingini nalunaarummut matumunnga ilanngussani takuneqarsinnaapput.
Imm. 5. "Ukioq katersiffiusoq nalunaarummi matumani paasineqassaaq qaammatisiutit ukiuat manninnik, qiviunik imaluunniit piaqqanik katersiffiusutut.

§ 2. Inuit piniarnermut allagartamik atuuttumik peqartut kisimik timmiarniarsinnaapput mannissarsinnaallutilluunniit.

 

Eqqissisimatitsineq

§ 3. Timmissat tamarmik eqqissisimatitaalluinnarput, taamaattoq takuuk imm. 2 aamma 3.
Imm. 2. Piffissat sumiiffiillu piniarfiusinnaasut taaneqartut iluini timmissat makku piniarneqarsinnaapput:

1) Appa Uria lomvia:
Kalaallit Nunaata kitaata kujataani:	15. oktober - 15. februar
Kalaallit Nunaata sinnerani:	1. september - 15. februar
Qaanaap kommuniani:	1. september - 15. juni
2) Appa sigguttooq Uria aalge:
Kalaallit Nunaata kitaata kujataani:	15. oktober - 15. februar
Kalaallit Nunaata sinnerani:	1. september - 15. februar
3) Appaliarsuk Alle alle:	1. september - 30. april
Qaanaap kommuniani:	1. september - 15. juni. Aammattaaq piaqqiorfiisa nalaani piaqqanik ulluniittunik katersuisoqarsinnaavoq.
Ittoqqortoormiit kommunianni:	1. september - 15. juni. Aammattaaq piaqqiorfiisa nalaani piaqqanik ulluniittunik katersuisoqarsinnaavoq.
4) Nerleq siggukitsoq Anser brachyrhynchus:
Kalaallit Nunaanni tamarmi:	1. september - 30. april
Ittoqqortoormiit kommunianni:	Timmissat ingerlaartut sikup sinaavanit julip aallaqqaataata tungaanut piniarneqarsinnaapput.
5) Nerlernarnaq Branta leucopsis:
Kalaallit Nunaanni tamarmi:	1. september - 30. april
Ittoqqortoormiit kommunianni:	Timmissat ingerlaartut sikup sinaavani julip aallaqqaataata tungaanut piniarneqarsinnaapput.

Imm. 3. Piffissani piniarfissani ataani aalajangersakkani Kalaallit Nunaanni tamarmi timmissat makkua piniarneqarsinnaapput (ullut taaneqartut marluk ilanngullugit):

Oqaatsoq Phalacrocorax carbo	1. oktober - 31. marts
Tuullik Gavia immer	1. september - 31. december
Qaqulluk Fulmarus glacialis	1. september - 30. april
Nerleq Anser albifrons	1. september - 15. oktober
Miteq siorartooq Somateria mollissima	15. oktober - 15. februar
Miteq qingalik Somateria spectabilis	15. oktober - 15. februar
Alleq Clangula hyemalis	15. oktober - 15. februar
Qeerlutooq Anas plathyrhynchos	1. september - 15. februar
Serfaq Cephus grylle	1. september - 15. februar
Naajaannaq Larus glaucoides	1. september - 30. april
Naajarujussuaq Larus hyperboreus	1. september - 30. april
Naajarluk Larus marinus	1. september - 30. april
Taateraaq Rissa tridactyla	1. september - 15. februar
Aqisseq Lagopus mutus	1. september - 30. april
Tulugaq Corvus corax	15. august - 28/29. februar

§ 4. Mannissarneq inerteqqutaavoq, taamaattoq takukkit imm. 2 - 4.
Imm. 2. Inuit piniarnermut allagartallit namminneq atugassaminnik qaqulluit, naajarluit aamma naajarujussuit manniinik ukiumi katersuiffiusumi 31. maj ilanngullugu mannissarsinnaapput.
Imm. 3. Inuit Ittoqqortoormiit aamma Qaanaap kommuniini najugaqartut namminneq atugassaminnik appaliarsuit manniinik mannissarsinnaapput.
Imm. 4. Inuit inuussutissarsiutigalugu piniarnermut allagartallit naajarujussuit naajarluillu manniinik, §13, imm. 3 naapertorlugu tuniniagassanik ukiumi katersuiffiusumi 31. juli ilanngullugu mannissarsinnaapput.
Imm. 5. Mannissarnermi allunaasaq, majuartarfiit, allunaasat innartornermi atugassiat innartornermiluunniit atortut allat atoqqusaanngillat.

§ 5. Nalunaarummi matumani innatut timmissat ineqarfiattut paasineqassaaq innaq timmissat imarmiut aappariikkuutaat ikinnerpaamik qulit piaqqiorfigisaat.
Imm. 2. Eqqarneq allatulluunniit pisorpalutsitsineq timmissat ineqarfiannit ungasissutsit uku iluini inerteqqutaavoq:
1) 5000 meterit, innaq timmissat ineqarfiat, appanit, appanit sigguttuunit, appaliarsunnit, taateraanit, qaqullunnit imaluunniit oqaatsunit inigineqarpat.
2) 200 meterit, timmissat ineqarfiat qeqertaappat, qeqertaasaappat imaluunniit ikkarluuppat, miternit, miternit qingalinnit, serfanit, imeqqutaallanit imaluunniit naajanit allanit taateraajunngitsunit inigineqartoq.
Imm. 3. Imm. 2-mi aalajangersagaq apeqqutaatinnagu ' 4 naapertorlugu mannissartoqarsinnaavoq.

§ 6. Piffissami 1. juni - 31. august sumiiffinni ukunani taakkunanngalu 500 meterisut ungasitsigisumi, nunamut niunissaq allatulluunniit angalanissaq inerteqqutaavoq:
1) Qeqertat kujataanni Lion Øer (Qaanaap kommunia).
2) Kuup Apparsui (Kommuneqarfik Upernavik).
3) Toqqusaaq (Kommuneqarfik Upernavik).
4) Kingittuarsuk, Angissup kimmut avannamut kitaani (Kommuneqarfik Upernavik).
5) Qaqqarsuup Apparsui (Kommuneqarfik Upernavik).
6) Salleq (Uuummannap kommunia).
7) Imerissut eqqaanni Assissut (ikkarluit Qeqertarsuup kommunia).
8) Kitsissuarsuit eqqaanni Nunatsiaq (Aasiaat kommuniat).
9) Kitsissunnguit eqqaanni Saattuarsuit (Aasiaat kommuniat).
10) Akuliarutsip Sermersuata eqqaani Naternap tunuani kangerluup affarlia Tasiusarsuaq (Kangaatsiap Qasigiannguillu kommunii).
11) Appat (Ilulissat kommuniat).
12) Kitsissut Avalliit (Qaqortup kommunia).

§ 7. § 5-imi aamma § 6-imi timmissat ineqarfiinik eqqissisimatitsinissamik aalajangersakkat immikkut ittut avataasigut, Kalaallit Nunaanni tamarmi timmissat ulluisa nutaat inigineqartulluunniit kiisalu timmissat manniisa piaraasalu ajoqusernissaat akornusersorneqarnissaalluunniit inerteqqutaavoq.
Imm. 2. Imm. 1-imi pineqanngillat, § 3, imm. 2, nr. 3 naapertorlugu, appaliarsuit piaraannik katersineq, aamma § 4 naapertorlugu mannissarnissaq.

§ 8. Timmissanik eqqissisimatitaalluinnartunik uumasunik toqungasunilluunniit taakkualu ilaannik taakkunanngalu nioqqutissianik tamanut saqqummiussilluni tuniniaanissaq, tunisinissaq pisinissarlu inerteqqutaavoq.

§ 9. Timmissat eqqissisimatitaalluinnartut uumasut toqungasulluunniit kiisalu tamakku ilamerngi taakkunanngaluunniit nioqqutissiat Kalaallit Nunaannit anniseqqusaanngillat.
Imm. 2. Timmissat eqqissisimatitaalluinnartut toqungasut nassaat taakkualu ilamerngi pinngortitami qimaannarneqanngippata piaartumik Pinngortitaleriffimmut imaluunniit politiinut, Pinngortitaleriffimmut tunniuneqarnissaannik isumaginnittussanut, tunniunneqassapput.
Imm. 3. Timmissanik nujuartanik kiisalu taakkua ilamernginik taakkuninngalu nioqqutissianik ilisimatusarnermi imaluunniit ilinniartitsinermi siunertanut atorneqartussanik annissisoqassappat, Avatangiisinut Pinngortitamullu Pisortaqarfiup akuersissuteqaqqaarsimanissaa piumasaqaataavoq.

 

Timmiarniarneq

§ 10. Angallammit motorilimmit angallat nammineq motorini atorlugu ingerlatillugu timmissanik timmisunik piniarneq inerteqqutaavoq.
Imm. 2. Qeerlutuunik nerlernillu isasunik ungoorilluni piniarneq inerteqqutaavoq.
Imm. 3. Timmisartunit, angallatinit motorilinnit snescooterinillu timmiarniarneq inerteqqutaavoq.

§ 11. Timmissanik aallaaniarneq piniarnerlu taamaallaat sakkut aallaasillu makku atorlugit ingerlanneqartassaaq:
1) Timmiarsiutit annerpaamik kaliber 12 qoorortuuararlu. Aallaasit eqqarasuartaatit eqittaannartakkallu atoqqusaanngillat.
2) Timmiarsiutit singissaartullit ("Pump guns") marluinnarnik patroneqarsinnaanngorlugit aaqqinneqarsimappata.
3) Amerlasuut aqerlumik sanaat 1. januar 2003 aallarnerfigalugu atoqqusaajunnaassapput.
4) Pisisseq qarsorlu aamma nuffit.
5) Qaanaap Ittoqqortoormiillu kommuniini appaliarsunniarnermi qalut aamma qassutaasat ipullit.

§ 12. Inuit sunngiffimmi aallaaniarsinnaanermut allagartallit appanik, appanik sigguttuunik, miternik miternillu qingalinnik ullormi ataatsimi amerlanerpaamik tallimanik pisaqarsinnaapput.

§ 13. Inuit inuussutissarsiutigalugu piniarnermut allagartallit timmissat pisatik suliarineqanngitsut, erisakkat imaluunniit piariikkat tamaallaat kommunimi najukkaminni atuisussarpiamut tunisinnaavaat.
Imm. 2. Imm. 1 naapertorlugu taamaallaat tunisisoqarsinnaavoq § 3, imm. 2 aamma imm. 3 naapertorlugit piffissani timmissat pineqartut piniagaaffiisa iluini.
Imm. 3. Inuit inuussutissarsiutigalugu piniarnermut allagartallit naajat manniinik § 4, imm. 4 naapertorlugu katersukkanik uunneqanngitsunik suliarineqanngitsunillu taamaallaat kommunimi najukkaminni tunisaqarsinnaapput.
Imm. 4. Timmissat pisat inuussutissarsiutigalugu nioqqutissiarineqassanngillat, suliarineqaratik qeritinneqassanatilluunniit Pinngortitamut Avatangiisinullu Naalakkersuisumit akuersissummik pisimatinnani.
Imm. 5. Imm. 4 naapertorlugu akuersissummi najukkami timmissat illersorniarlugit piffissamut aamma sumiiffimmut tunisinermilu amerlassutsinut piumasaqaatinik aalajangersaasoqarsinnaavoq. Aammattaaq akuersissummi tuniniaanermi piumasaqaatinik aalajangersaasoqarsinnaavoq, tamanna najukkami timmissat illersorneqarnissaannut sunniuteqaqataasinnaappat.

§ 14. Nalunaaqutsiussat, nalunaaquttat, radiukkut aamma qaammataasakkut nassitsissutit timmissani pisarineqartuni nassaarineqartut, sumi qangalu timmissap pisarineqarsimaneranik paasissutissartalerlugit Pinngortitaleriffimmut nassiunneqartassapput.

§ 15. Timmissat pisat, matumani aamma timmissat aalisarnermi saniatigut pisat tamarmik, ukiumoortumik Piniarnermut nalunaarutigineqartassapput, taakku Piniarnermi pisanik nalunaarsuiffimmi immersugassami ilaappata.
Imm. 2. Manniit inuussutissarsiuteqarnermut atatillugu aamma nammineq atugassatut katersukkat ukiumoortumik Piniarnermut nalunaarutigineqassapput, taakku Piniarnermi pisanik nalunaarsuiffimmi immersugassami ilaappata.

 

Aalajangersakkat allat

§ 16. Kalaallit Nunaanni timmissat nujuartat uumasuutigineqarnissaat inerteqqutaavoq.
Imm. 2. Timmissanik nujuartanik ajoqusersimasunik paaqqutarinninnermi Avatangiisinut Pinngortitamullu Pisortaqarfik imm. 1-ip saneqqunneqarnissaanut immikkut akuersissuteqarsinnaavoq.

§ 17. Timissanik Kalaallit Nunaannut eqqunneqartunik tamakkulu piaraannik pinngortitamut anisitsineq inerteqqutaavoq.

§ 18. Timmissanik nujuartanik nalunaaqutsersuisoqassappat, ilisimatusaatigalugu timmissanik nujuartanik imaluunniit timmissanik nujuartanik misissugassanik katersisoqassappat Avatangiisinut Pinngortitamullu Pisortaqarfiup akuersissuteqaqqaarsimanissaa piumasaqaataavoq.

§ 19. Avatangiisinut Pinngortitamullu Pisortaqarfik nalunaarummi matumani ilisimatusarnermut atatillugu imaluunniit ilinniartitsinermut atatillugu siunertanut aalajangersakkanik saneqqutsinissamut akuersissuteqarsinnaavoq.

 

Pineqaatissiinerit

§ 20. Nalunaarummi matumani §§ 2- 4, § 5, imm. 2, § 6, § 7, imm. 1, § 8 - 15, § 16, imm. 1, § 17 aamma § 18 -imi aalajangersakkanik unioqqutitsinerit akiliisitsinermik pineqaatissiissutaasinnaapput.

 

Atortuulersitsineq

§ 21. Nalunaarut una atuutilerpoq ulloq 1. januar 2002.
Imm. 2. Peqatigitillugu Kalaallit Nunaanni timmissanik eqqissisimatitsineq pillugu Namminersornerullutik Oqartussat nalunaarutaat nr. 29, 19. september 1989-imeersoq atorunnaarpoq.
Imm. 3. Aammattaaq atorunnaarput:
1) Cirkulære af 8. november 1955 til kæmnerne samt inspektørerne i Nord- og Østgrønland angående ringmærkningspriser (K-27-7-1).
2) Kaajallaasitaq 1. maj 1959-imi timmissanik nalunaaqutsersuisarneq pillugu (K 27-7-2).
3) Malittarisassat 22. februar 1961-imit atulersinneqartut 9. juni 1961-imi Nuup kommuneqarfiani Qooqquni, Innajuattumi, Innajuattunnguami Innaarsunnguamilu timmissat innani inillit innarlitsaalineqarnissaat pillugu.
4) Kangerlussuup nunataata ilaani tuttuuteqarfissamik immikkoortitsinissaq aammalu aqissit, qeerlutuut, nerlerit ukallillu eqqissisimatitaanissaannik Sisimiut kommuniani ileqqoreqqusaq 15. februar 1968-imeersoq.
5) Savissivimmi appaliarsuit timmiarsiummik nakkartillugit pisarinissaasa inerteqqutaaneranik Thulep kommuniani malittarisassaq 6. juli 1972-imeersoq.
6) Timmissat piniagassat eqqissisimatitaaffeqarnissaannik Maniitsup kommuniani malittarissassaq 27. november 1972-imeersoq.
7) Aqissit eqqissisimatitaanissaannik Qaqortup kommuniani ileqqoreqqussaq 2. november 1973-imeersoq.
8) Timmiarniarneq puisinniarnerlu pillugit Ilulissat kommuniannut kommunit ileqqoreqqusaat 6. februar 1975-imeersoq.
9) Qeqertarsuup kommuniani Kangerlummi miternik eqqissisimatitsineq pillugu ileqqoreqqusaq 20. december 1979-imeersoq.
10) Upernaviup kommuniani miternik eqqissisimatitsinissamik ukiuni tallimani ileqqoreqqusaq 7. januar 1987-imeersoq.
11) Avanersuup Kommunianut maleruaqqusaq 12. januar 1989-imeersoq, Etahp avannaani mitit piaqqiorfianni manninnik katersisarnerup ullutartarnerullu inerteqqutaanerat pillugu.

Namminersornerullutik Oqartussat, ulloq 6. december 2001.

Alfred Jakobsen

/

Hans J. Høyer